10 Tarike Youtube par jada subscribes laane ke

Youtube par har minute 500 ghante se jada videos upload hoti hai.

Jis kaaran se Youtube par apni nayi Video ko famous karna din par din mushkil hota jaa raha hai.

Lekin agar aapke paas subscribers hai to aapki Videos Youtube par upload hote hai unke paas chali jaegi. Aur aapko apni video par turant view mil jaege.

Jab hum apne ghar mai “Times of India” ka newspaper lagwate hai to hum us newspaper ko subscribe kar rahe hote hai, jisse ki hume har naya newspaper prapt ho jata hai.

Theek isi tarha jab log aapke YouTube channel par subscribe karte hai to unke paas aapke Nayi video ki jaankari pohoch jaati hai.

Aur sabse badhiye baat ye hai ki log aapke channel par free mai subscribe kar sakte hai, Lekin aapk Ads ke dwara paisa milta rehta hai.

Aapki video cahe jitni bhi achi kyo na ho. Lekin agar aapke channel par subscribers nahi hai to kisi ko pata hi nahi chalega ki aapne koi Video bhi launch ki hai.

Is post mai hum seekhege ki aap kis tarha apne YouTube channel ke subscribers ko bhada sakte hai. Hum jaanege tarike jinke istimaal se aap aapne subscriber aur views dono bhada sakte hai.

To chaliye seekhte hai

Lagataar post kare

Blogging ki hi tarha Videos ko samye samye par post karte rehna cahiye.

Agar aap regularly youtube videos ko post karte hai to aapke channel ki ranking mai sudhar aayega. Aur aapki following bhi bhadegi.

Continue videos upload karna Video marketing ka sabse ahem hissa hai.

Isse aapke channel mai Gati (momentum) ayegi. Aur aapki khud ki bhi regular videos banane ki ek aadat ban jaegi.

Har Roj ya phi hafte mai Do ya Ek din, Videos post karne ka aapka ek schedule hona cahiye.

Aur agar aap koi na koi nayi video upload karte rehte ho to logo ke paas aapke channel ko subscribe karne ki kuch wajha hogi.

Maan ligiye ki aapko pichle 3-4 mahine se ek bhi video nahi daali to log to yahi soche ge ki aapka channel shayad band ho gaya hai. Jis kaaran se wo subscribe bhi nahi karege.

Mai to sujhaav dunga ki shuruwaat mai roj din ke 20-25 min vidoe par kaam karo, aur hafte mai ek din ek video upload karo. Aur agar aapke paas extra videos ho jaye to aap un videos ko baad mai upload kar sakte hai.

Agar aap ek mahine mai 4 videos post karte hai aur aapke paas 20 videos ready hai to aapka 5 mahine ka material to ready hai. Ab jo bacha hua time hai aap usme aur jaada videos bana sakte hai.

Phir jab aapke paas 50-60 videos hojae to aap hafte mai 1 ki bajaye 2 videos daal sakte hai.

Life me kahi baar kuch esa time aa jata hai jis samye par hum kaam nahi kar paate. Extra Videos ready rakhne se ese ache ya bure wakt mai aapka flow nahi tootega.

Log jitna jaada aapke channel par baar baar ayege, aapka channel YouTube par utna behtar perform karega.

Aap agar cahe to apni Videos ko Youtube mai schedule bhi kar sakte hai.

Valuable Videos banaye

Value se mera matal hai esi videos jo kisi ko kuch fayada pohchaye.

Ek infographic ke mutabic 2017 mai internet ka 69% traffic videos dekhega. Jiska matlab ye hai ki video future hai.

Aur agar aapko is moke ka fayada uthana hai to aapko bhadiya youtube videos banani seekhni hogi.

Behtreen videos banane ke liye baaki logo se hatkar sochna padega, mai aapko hatkar sochne ka tarika batata hun.

————-
Aapne bachpan mai Mario game kheli hogi.

Jab Mario Mushroom khata hai to wo Super Mario ban jata hai.

Aapki videos us Mushroom ki tarha honi cahiye.

Ek normal vyakti jo ki Mario hai ve aapki video ko dekhne ke baad super mario ban jana cahiye.

Jab bhi aap kisi bhi video ka topic decide karne lage to esi soch dimaag mai rakhe.
————-

Agar video dekhne waale ko aapki Videos se kuch fayda milega to hi wo aapki aur bhi videos dekhna cahega. Aur aapke channel ko jaroor subscribe karega.

Video ka topic select karne ke liye neeche di gayi baato ka dhyaan rakhe:

Agar aap apne topic mai expert hai to aapko nayi video ka idea sochne mai jada samye nahi lagega.

Maan ligiye ki aapko “Pushups” ke baare mai video banani hai.

Pushup se sambandhit ek acha Title dhundne ke liye sabse pehle youtube ke search box mai “pushups” type kare.

Jab bhi aap youtube mai kuch bhi search karne ke liye likhte hai to youtube aapko sujhaav deta hai.

Lekin pushups bohot hi bada topic hai kyoki hazaro tarha ki techniques hoti hai. Hum keyword ko thoda aur targeted karne ke liye “Pushups for chest” daalkar dekhte hai.

Ab dekhiye hume kuch ache sujhav mil rahe hai.

Jese ki :

• Pushups for chest at home
• Pushups for chest and biceps
• Pushups for chest and arms
• Pushups for chest shape

Youtube ke dwara diye gaye sujhaav ese sujhaav hote hai jinke baare mai bohot jaada log search kar rahe hai. Youtube ke sujhaavo ka istimaal karne se ye confirm ho jata hai ki hum ese topic par video bana rahe hai jiske baare mai pehle se hi Demand hai.

Hamesha esa topic par video banaye jisme aapki poori research ho.

Youtube par jaadatar log Internet marketing ya SEO ke baare mai nahi jaante, jiska aap fayada utha sakte hai.

Agar aap sahi tarika ka use karege to aap bade bade experts ki videos se bhi upar rank kar sakte hai.

Is baat ka jaroor dhyaan rakhe ki aapke channel ek Mushroom ki tarha hona cahiye. Jo bhi aapke channel par aye use har baar kuch naya seekhne ko milna cahiye. Esa karne se hi aapke subscribers badhege.

Behtareen Youtube Video banane ke liye in baato ka bhi dhyaan rakhe:

• Production quality sudhaare. Agar abhi aap akele kaam kar rahe hai to Internet se Video editing ke baare mai kuch seekh sakte hai.
• Video ka sabse jada important hissa hai uski Audio. To hamesha ek acha Mic use kare.
• Video ko bohot jada edit na kare, kuch galtiya karna theek hai.

Timeless Videos Banaye

Video banate samye hamesha lamba soch kar chale.

Esi videos banaye jo ki logo ko aane waale 5 saalo tak fayada de.

Kyoki itni mehnat karne ke baad bhi agar video sirf 2-3 months ke liye hi valid ho to kya fayada. Timeless video se mera matlab hai esi videos jo Evergreen ho.

Kahi saare log videos banate hai jese ki “Google ne naya android version nikala” Esi videos thoda bohot traffic to lati hai lekin esi videos ki kuch samye ke baad value nahi rehti.

Evergreen videos banane ka sabse bhadiya tarika hai ki esi videos banaye jo logo ko kuch sikhati hai (value deti hai).

Jese Hindi ka sabse famous youtube channel kyakaise karta hai.

Logo se Subscribe Karne ke Liye Kahe

Logo se channel par subscribe karne ke liye reqeust karo.

Ye sabse aasaan aur important tarika hai Youtube par subscriber laane ka.

Request karne ka tarika har jagha kaam karta hai, cahe wo politics ho, Blog post, offline business ya phir koi reality TV show.

Agar logo ko aapka kaam pasand aya, aur phir aap unse apne channel ko subscribe karne ke liye kahege to wo aapke channel par jaroor subscribe karege.

Lekin kabhi bhi apne viewers ko force na kare. Bas Video ke end mai pyaar se ek baar “Channel par subscribe” karne ke liye keh de.

Mai aapko request karne ke kuch steps batata hun:

1. Pehle kahe ki kya karna hai
2. Phir kaise karna hai
3. Akhir mai kyo karna hai

Inhi steps se bana mera ek udharan hai:

1. Thank You is video ko dekhne ke liye, Aap hamare channel ko subscribe kar sakte hai.
2. Subscribe kar ke liye is video ke neeche bane subscribe button par click kare.
3. Subscribe karne se aapko hamari aane waali sabhi nayi videos ki updates pohchti rahegi.

Aap dekh sakte hai ki maine apne views ko subscribe karne ki wajha bhi dedi.

Annotations ka istimaal kare

Aapne dekha hoga ki lagbhag har YouTube video par kuch boxes bane aate hai, jinar aap click kar sakte hai aur ya phir hata sakte hai.

Aap vicsnatural ki YouTube video mai esa dekh sakte hai.

In boxes ko “annotations” kehte hai. Is video mai diye gaye annotation par jab aap click karege to aap channel ke subscription page par chalejaege.

Annotation ek bohot hi karger tarika hai jisse aap apne YouTube channel ke subscribers ko bhada sakte hai.

YouTube par video upload karne ke baad aap apni Video ko edit karke annotations ka use kar sakte hai.

Agar aap apni videos par subscribe karwane ke liye annotation daal rahe hai to annotation ko video ki starting mai na daale. Kyoki abhi vyakti nai aapki video dekhi nahi hai aur uske paas abhi aapki video par subscribe karne ki koi vajhe bhi nahi hai.

Shuru mai annotation daalne se aap apne viewer ko irritate bhi kar sakte hai.

Annotations ko video ke end mai hi daale, kyoki agar aapki video agar vyakti ko pasand ayi to wo video dekhne ke baad aapke channel ko subscribe karna cahega.

Annotation ki duration (yani samye) ko aap bohot jaada na rakhe. Utna hi rakhe jitna cahiye. Jada time tak annotation dikhane se aapka viewers irritate ho sakta hai. Jisse ki aapke channel par negative effect padega.

Apne channel ko theme de

YouTube par jitne bhi popular channels hai, wo sab ek hi topic ke baare mai Videos banante hai, un sabhi ki ek hi theme hai.

Jese ki LondonReal Channel apni sabhi videos mai kisi na kisi inspirational vyakti ka Interview leta hai. Aur youtube ka sabse famous channel PewDiePie ki jadatar videos Play commentaries ki hoti hai.

Ek tarha ki Video banane se aapke channel ki ek pehchaan ban jaati hai, It topic se aap jaane jaate hai.

Aur jab koi bhi vyakti use topic ke baare mai sochta hai to aapka channel pehle uske dimaag mai aata hai.

Maan ligiye ki aapka YouTube channel Bodybuilding ki jaankari deta hai. Jo log Bodybuilding mai interested hai wo aapke channel ko subscribe karege.

Logo ke dimaag mai ek aapke channel ko lekar ek image ban jaegi. Aur jab hi kabhi Bodybuilding ka jikar hoga to aapka channel pehle dimaag mai ayega.

Isliye mai hamesha kehta hun ki esa Topic hi chune jisme aap interested ho, jisme aap ache ho, jisme aap apni pehchaan banana cahte ho. Kyoki agar aapke ander apne topic ko lekar passion hoga to bure waqt mai aap apna raste se nahi hatege.

Aur maano ya na maano kamyabi ki rah par bura waqt bhi jaroor ata hai.

Apni Videos par click Bhadaye

Aapne Video banake Youtube par daaldi, aur aapki video search result mai bhi aa rahi hai.

Lekin sirf aapki Video hi nahi aa rahi hai, aapke competition ki bhi aa rahi hai. Aur jaahir si baat hai ki subscribe karne ke liye pehle logo ko aapki video ko kholna padge.

Ab hum seekhte hai ki Videos par click kaise karaye.

Jab Search result mai video aati hai to 3 cheeze saamne dikhti hai:

• Headline
• Image Thumbnail (Video ki photo)
• Description (Video ke baare mai jaankari)

Aapki video cahe jitne bhi badhiya ho, lekin agar ye teeno cheeze sahi se nahi set kari hai to aapki video par kam clicks hoge aur aapki video ki ranking bhi nahi badh payegi.

To sabse pehle dekhte hai ki Video ki Headline kaise likhe.

Jese maine apni ek post mai Article ke title par dhyaan dene ko kaha tha, theek usi tarha aapko apni Video ke title par bhi dhyaan dena cahiye.

Log youtube par video kuch words likh kar search karte hai, aur agar aapka title un words se match karta hai to aapki video youtube search result mai aayegi.

Isliye video ke title mai video se sambandhit words jaroor hone cahiye. Search kiye hue keywords aur video ke title mai likhe hue keywords aapus mai match hone cahiye.

Blog post ki headline ki tarha aap apne Video ki headlines mai number ka istimaal bhi kar sakte hai. Log Numbers waale title jada pasand karte hai.

Aap apni Headline ko dash (-) ya phir colon (:) ka istimaal karke do hisso mai bhi tod sakte hai. Ek hissa to aapke main topic par focus karega aur doosra hissa logo ka dhyaan kheechne ke liye.

Aap dekh sakte hai ki is Video ke title ko 2 hisso mai banta gaya hai.

Video ka Thumbnail, video ki wo photo hai jo YouTube search results mai bani aati hai.

Is Photo ko ache se banana bhi jaroori hai kyoki isse logo ko idea ho jata hai ki video ke ander kya hai.

Title ki hi tarha Video ke thumbnail mai saaf saaf dikhna cahiye ki video kis baare mai hai.

Aap neeche diye gaye search result mai bina padhe andaja laga sakte hai ki Video Pushups ke baare mai hai.

Aap viewer (vyakti) ko thumbnail ke dwara hi video ko dekhne ke benefits dikha sakte ho.

Is neeche di gayi video ne apne thumbnail mai Before/After dikhakar Video dekhne ka fayada dikhaya hai. (Pata chal raha hai ki video dekhne ke baad aapko kya results mil sakte hai)

Aap apni video ke thumbnail mai Text ka use bhi kar sakte ho. Text se logo aur jada attract hote hai.

Thumbnail ko edit karte samye in baato ko dhyaan rakhe:

• Thumbnail ka size jada se jada bada hona cahiye, kyoki thumbnail kahi baar embedded players mai bhi use hota hai
• Thumbnail ka resolution 1280×720 rakhe.
• Image ka size 2MB se kam rakhe
• Image ka format .JPG, .PND, .GIF ya phir .BMP hi rakhe

Internet par kahi saari websites hai jo aapko Youtube video ke liye thumbnail banane mai help kar sakte hai.

Youtube video ka description hai jaha par bohot se log peeche reh jaate hai. Kyoki sahi description chunna thoda mushkil hai.

Jab hum Youtube par kuch search karte hai to hum likh kar search karte hai, Lekin videos mai kuch likha nahi hota wo dekhne ke liye hoti hai. Isliye youtube ka search engine Title ke sath sath Description se bhi andaja lagata hai ki aapki video ki baare mai hai.

Aap Video ka description jitna cahe utna bada likh sakte hai. Lekin jab hum Youtube par video search karte hai to description ki pehli 2 lines hi aati hai.

In 2 lines ko hume sabse jada soojh boojh se likhna cahiye.

Ye ek bhadiya example hai jisme samajh aa raha hai ki video kis baare mai hai.

Jab log aapki video dekhte hai to wo video ke neeche likha poora description pad sakte hai.

Aap pehli 2 lines mai to apni Video ke baare mai likh sakte hai aur 3rd line mai apni website ka link de sakte hai. Kyoki bohot se log Video dekhne ke baad aapki website par jaana pasand karege, 3rd line baad description hide ho jata hai aur SHOW MORE ka button bana hua aa jata hai.

In 3 lines ke baad aap apni Video ke baare mai aur jada likh sakte hai. Yaha par:

• Apni Social media profiles ke links daale
• Description ko aur vistaar se likhe
• Apne video mai kya kya bataya aap usko steps banakar bhi likh sakte hai.

YouTube videos mai tags bhi bohot jaroori hai: Tags aapki videos se jude hue kuch keywords hote hai jo ki youtube ke liye aapki video ke baare mai aur jada jaanne ka ek jariya hai.

Aap YouTube video upload karte samye tags ko add kar sakte ho.

Aur Tags ke sahi istimaal se aap apni YouTube video ki ranking par ek positive effect daal sakte ho. Lekin agar aapne Tags ka galat istimaal kiya to aapki video par negative effect bhi padh sakta hai.

Galat istimaal se mera matlab hai ki ese tags jinka aapki video se kuch lena dena hi nahi hai.

Headline, Description, Thumbnail aur Tag ko agar aap sahi tarike se istimaal karoge to aapki video ke suggested videos mai aane ke chances bhi bhad jaate hai.

Suggested videos wo videos hoti hai jo Youtube kisi bhi video ke sidebar mai dikhata hai. Ye suggestion dekhi jaa rahi videos se milti julti hoti hai. Aur jadatar log video dekhne ke baad yahi par click karte hai.

Video Blogging kare

Agar aapka koi blog bhi hai to aap apni video se sambandhit ek blog post likhkar uss video ko apni post mai embed bhi kar sakte hai.

Esa karne se aapke YouTube channel ko jada exposure milega kyoki. Jo log Google search se aapke blog par aa rahe hai wo bhi aapki video dekh sakege.

Sath hi Blog post me related video add karne se aapki post ki search ranking bhi sudhar sakti hai.

Aur sidebar mai Youtube widget box lagaye. Is box mai bane subscribe button par click karne se koi bhi vaykti turant aapke channel ko bina khole subscribe kar sakta hai.

Aap dekh sakte hai ki kis tarha likeamanfitness.com blog nai Embed aur Subscribe box ka fayada uthaya.

Comments ke reply Kare

Jab aap youtube par bhadiya videos banakar daalege to log aapki videos par jaroor comments karege.

Har comment ko reply karne ke koshish kare. Isse aapki audience ko lagega ki aap unki baat ki value karte hai, jisse prabhavit wo aapke subscriber baana cahege.

Youtube video par comment karne se aapko bhi ye andaaza ho jaega ki aap kya galtiya kar rahe hai. Aapki videos mai kya kamiya hai aur logo ki demant kya hai. Jisse aap behtar videos bana sakege.

Partnership aur Interview kare

Aap apni hi field ke kisi famous YouTuber ke sath milkar videos bana sakte hai. Esa karne se unke viewers ko kuch naya dekhne ko milega aur saath hi aapko bhi exposure milega.

Agar aap apni field ki kisi famous vyakti ka YouTube par interview le sake to aapke channel par bohot jada subscribers aa sakte hai.

Esa isliye hai ki use famous vyakti ki pehle se hi ek pehchaan bani hui hai aur use internet par bohot se log follow kar rahe hai. Jab aap unke saath judege to aapke followers bhi badhege.

Bohot jada famous log busy schedule ke kaaran interview nahi de paate lekin aap pehle chote level ke logo ka interview daal sakte ho. Phir jab aapki kuch following ban jaegi tab shayad wo jala level ke log bhi interview ke liye tayaar ho jae.

Conclusion (निष्कर्ष)

YouTube par apne channel ko kaamyaab banana thoda mushkil to jaroor hai, lekin naamumkin nahi hai.

YouTube internet marketing aur online paisa kamane ka Future hai. Blogging to bacha bacha kar raha hai. Youtube par bohot jada log videos dekhte hai aur Agar aap aabhi se YouTube par kaam karne lag gaye to aane waale time mai aap kaamyaab hojayege.

Mujhe umeed hai ki is article mai maine jo sikhaya aapko usse jada apne channel par jada subscribers laane mai help milegi. Aur YouTube par kaamyaad banne ka moka milega.

Intni bhadia videos banao ki vyakti aapka Fan ho jaye. Shuru mai thodi problem jaroor ayegi, lekin time ke sath sath apni Videos banane ke skills ko improve karte raho.

Jab koi aapki Video par click kare to annotations ke istimaal se Video par subscribe karna aasaan banao.

Aur jab koi search kare to behtareen Title, Thumbnails aur Description ka use karke apni Video ko search result mai upar laaye.

Jesa ki Albert Einstein ne kaha hai –

A person who never made a mistake never tried anything new.

जिस व्यक्ति ने कभी गलती नहीं कि उसने कभी कुछ नया करने की कोशिश नहीं की.

To agar aap koshish karne ke baad bhi Fail ho rahe hai to ghabraiye nahi aap unse to bohot ache hai jinhone kabhi try bhi nahi kiya.

Baar baar ek hi galti na dohraiye, Apne tariko mai thoda bohot badlaaw laiye aur phir se koshish kijiye.

Is article se sambandhit koi bhi jaankari ke liye neeche diye gaye box mai comment kare.

Thank You 🙂